#اعتراف

 

#اعتراف

النهاردة عاوزة اعترف اني كسلانة ...بجد اوقات كتير باخد قرار ان احب نفسي ...لكن القرار سرعان ما يتبخر...اول ما ابتديت اشتغل كنت شعلة من النشاط ...الصحيان بدري والمرواح عالساعة 9 بالتمام ...سنة و سنتين ..وفي السنة التالتة قررت اقدم دراسات عليا وفعلا روحت طنطا وانا عمري ماطلعت برة باب محافظتنا ..بصراحة كانت سنة ولا كل السنين ...كنت محتاجاها جدا ..كنت طالعة من تجربة خطوبة فاشلة ..وللاسف اننا اوقات كتير بنزعل على حاجات مينفعش نزعل عليها او المفروض منزعلش عليها ..لسبب بسيط ..بس الفشل وحش قوي وبيكسر البني ادم 

كنت رفيعة وسيبت نفسي للاكتئاب وتخنت ولسة لحد دلوقتي بحاول انزل وزني ...لكن مش قادرة علشان كدة بقول اني بقيت كسلانة ...المهم ابتديت اتغيب عن العمل علشان الحضور في الكلية ..واتاخر في المرواح للعمل الايام التانية علشان الاجهاد ...السنة دي رغم اني كنت محتاجاها الا انها برضو اثرت فيا بشكل سئ ...اوقات كتير بيمر في حياتك احداث ومواقف ملهاش اي معنى ومش عارف ايه لازمتها غير انها مجرد حشو ...دلوقتي بمر بنفس الموضوع ..بعد ما اخدت التمهيدي وشغالة في الموضوع بقالي دلوقتي 3 سنين ..كل ما اروح الكلية يقولوا لي هنبقى نحدد لك موعد ونخطرك بيه ..بالضبط كدة زي فوتي علينا بكرة ...معرفش بجد ايه كسرة النِفس دي ...بجد مبقتش عارفة العيب مني انا ولا من اللي بيكسروا نفسي ...انا مش هاخد مكان حد في هيئة التدريس ...ليه بيتعاملوا معايا كدة ...دي حاجة انا واخداها علشان الوقت الفاضي ..يعني كمان دي مستكترينها علينا...مرة وانا في محاضرة في طنطا بسأل دكتور سؤال وجاني الرد من معيد كان قاعد ورايا "انتي بتسألي ليه ..انتي اللي زيك متجوزة وقاعدة بتربي العيال" ...اكيد كلهم بيفكروا كدة ..طيب واذا كان مفيش اقعد بقى افكر واحط ايدي على خدي ...بجد من اليوم ده وانا مضايقة من نفسي اني مرديتش عليه وعرفته ان الله حق ...بس كلهم كدة وكل الرجالة بيفكروا كدة ان اي ست ممكن تزاحمه في الشغل وتاخده منه حتى لو كان ده كله اوهام في راسه ....للاسف انا مش كسلانة ...انا خوافة ..وخوفي قاتلني وقاتل كل شيئ فيا و عاوزة اصرخ باعلى صوت (ملعون أبـ** يا خوف )

سبتمبر

في شهر سبتمبر 

قال أحد المتزوجين

المرأة گالحذاء يستطيع الرجل أن يغير ويبدل متى وجد المقاس المناسب له

فنظر الحاضرون إلى رجل حكيم كان بين الجالسين وسألوه:
...ما رأيك بهذا الكلام؟

فقال: ما يقوله الرجل صحيح تماما

فالمرأة كالحذاء في نظر من يرى نفسه قدما
وهي كالتاج في نظر من يرى نفسه ملكا
فلا تلوموا المتحدث بل أعرفوا كيف ينظر إلى نفسه

نماذج رديئة

 

نماذج رديئة

" اعرف واحدة كانت بتضرب جوزها اللي عنده القلب لدرجة ان كانت بتضرب تضرب فيه ومحدش يقدر يحوش عنه "

كان هذا نص ما قاله عريس متقدم لاختي بعد سؤالها:

" ان كانت في يوم ممكن تضرب جوزها !!"

وبالرغم من استنكار اختي للسؤال الغير طبيعي ان يتم سؤاله في ما يفترض انه لقاء للتعارف .... الا انها ابت ان تفكر في سبب مثل هذا السؤال ..لان الطبيعي ان الزوجة لا تضرب زوجها ....

المهم 

 ان هذا العريس ويوم تلبيس الدبل .... وليس يوم شبكة او حفل خطوبة ...فوجئنا بدخوله البيت معه اعمامه واخواله وعماته وخالاته واولاد عماته واولاد خالاته واولاد اعمامه واولاد اخواله... وكانه فرح ..كل اللمة دي على دبلتين ...

بدون ذكر تفاصيل اكثر لان الموضوع لم يتم ....اتضح ان هذا العريس كان يحكي عن والدته التي تضرب زوجها المريض بالقلب...وليس هذا فقط بل ان العائلة لها عادة كل اسبوعين يذهبوا سويا لخطبة احدى الفتيات ويتناولوا الجاتو عندها ... وكانها فسحتهم ,...ثم لا يتم موضوع الخطوبة  ...وتقوم عائلة العروس بارجاع الدبلة ... دي حاجة كدة عندهم في العيلة وماشيين عليها كلهم ... واوقات لو العيلة مرتاحة ماديا قوي ...يتم فسخ الخطوبة قبل كتب الكتاب ...

للاسف هناك نماذج رديئة في المجتمع ...يجب ان يتم لفظها من المجتمع قبل ان تقضي عليه ... لان تلك النماذج الرديئة لا تُعَلِم ولا تحمل في قلوبها الا الشاذ من كل الاخلاق و يقضي على الشعور بالامان ....ويرسخ الخيانة في قلوب من تعاملوا معهم ...فلا يستطيعون الثقة في اي شخص بعد ذلك .. انهم لا يحملون اخلاص الحيوانات حتى ...لكنهم يحملون رداءة الخُلُق...

خونة D:

خونة D:

في الكلية كان عندي واحدة صاحبتي بتحبني قوي... مفيش مرة الا واسمعها بأذني بتتكلم عليا ...كنا 3 اصحاب بنفوت على بعض واحنا رايحين الكلية والاتنين  اصحابي دول كانوا اصحاب جدا ولازم يروحوا مع بعض وانا بينهم طرف تالت ...اقدر اتكلم ولا اتنفس ولا اقول لـ (صاحبتي) التانية  : كانت بتقول لك ايه ؟؟؟

لا يمكن طبعا ...

عارفين في المرات اللي سمعتها فيهم كنت مش عارفة ..هل ده حظها الوحش ؟؟؟

اني اسمعها ولا هي يعني مصرة انها تسمعني انها بتتكلم عليا 

المهم ...

اقترحوا اقتراح ان نجيب في اعياد ميلادنا هدايا لبعض ..قال يعني الحب فايض وعلى الجنبين 

انا مكدبتش خبر ...ده عيد ميلاد الغالية ...اومال

روحنا محل انا و (صاحبتي) التانية وفضلنا ندور ونلف ..لحد ما لقينا علبة كدة مكتوب عليها (دومينو)

اول ما تفتح العلبة تلاقي فجأة صرصار على ايدك 

(صاحبتي) قالت لي :هاتيها لها ... وانا اقول لها : بلاش ...الظاهر كانو متخانقين سوا

المهم ان في الاخر قررت ان اجيبها لها ...وصممت اديها لها في المدرج مش برة

اول ما فتحت العلبة و صرخت وحدفتها على البنش اللي قدامنا 

البنش اللي قدامنا صرخ على صريخها وحدفها قدامه ... وهكذا

المهم ان احنا كنا تقريبا في البنش ال12

وطلعت جبت العلبة من قدام البنش الاول

بصراحة ...ورغم ان عرفت ان صاحبتنا اتصلت بيها وحذرتها الا ان كان في شعور كدة اللي هو 

(يااااااااااااه يا عبد الصمد ) اخيرا ... 

لا وهي اللي طالع عليها ان احنا خونة  ...بس ما قلتش خاينين من انهي اتجاه  D:

 

4سنين

 4سنين

تلك الفترة قد تبدو قصيرة بالنسبة للبعض ....وطويلة لاخرين لكن بالنسبة للبعض هي الجحيم بعينه ....لانها قد تكون شاهدا على غباء المرء ..او بالاحرى على مشاعره الغبية ...
اربعة سنوات هي المدة التي انتهت بكونها الاولى على دفعتها ...انها نتاج العمل المضني وسهر الليالي و حرقة الاعصاب



كانت تسبق الرجال من دفعتها حتى ان من كان بعدها كان رجلا ... دق جرس المنزل لتفاجأ بزميلها في الدفعة من يتبعها في التقدير هي الاولى وهو الثاني..

"الحقيقة انا كنت متابعك من زمان ومعجب باخلاقك وهدوئك .. اصل انا مش بحب بنات اليومين دول ..المذاكرة مش في دماغهم ومستهترين ..بس انتي حاجة تانية لفتي نظري من اول نظرة"

تلك الكلمات التي اخترقت قلبها فشطرته لنصفين .... جعلتها توافق على الخطوبة ...

" بصي احنا هنتفق على حاجة مش معقولة اكون انا الراجل في البيت ومراتي هي اللي تصرف عليا ... انا بابا وماما بيسمعوني كلام زي الزفت كل يوم ... وانا لا يمكن اسيبك ...مستحيل اسيبك "

كان الامر ليكون الطف لو كان صريحا
الا انها الان تلعن اليوم الذي فتحت فيه الباب من الاساس لذلك الشخص الذي اتضح انه جاء اليها لسبب واحد...انها من كانت سيتم تعيينها لانها الاولى على الدفعة ...

خطبها الى ان تنازلت عن التعيين وفي نفس يوم استلامه للتعيين ارسل اليها يطلب الدبلة والهدايا لانه فسخ الخطوبة ...وسابها

حقق المستحيل ابن الايه ...

ذكريات

ذكريات

امبارح وانا بقلب في خانة الذكريات افتكرت  وانا في ابتدائي اتسرق كتاب العربي مني دون غيره 3مرات بصراحة مكنتش اعرف ايه الحرامي المثقف ده اللي مش بيسرق غير كتاب العربي ده :) ...

بابا كان بيشتري لي كتاب من المخازن في كل مرة اتسرق فيه ...اخر مرة قال لي انه لو اتسرق مني تاني مش هيجيب لي غيره

وانا بصراحة بخاف من بابا قوي 

بقيت مضطرة اشيل الشنطة السبعة كيلو في الفسحة ...او اقعد جنبها في الفصل ...مش بتحرك ...لحد ما في مرة كنت زهقت ان الكل بيسيب الفصل وانا قاعدة وسبت الشنطة وكالعادة اتسرقت...

في ولد كان معانا في الفصل ,,معرفش ازاي شكيت فيه ان الكتاب معاه ..او تقريبا حد قالي انه معاه 

المهم ان في الفسحة روحت فتحت شنطته ولقيت كتابي في الشنطة ودورت اكتر لقيت استيكة كانت ضايعة مني وقلم اخدتهم برضو..

بصراحة 

متسرقتش تاني بعدها ........وقتها كانت جراءة مني اني اعمل كدة بس اللي فكرت فيه كطفلة انه سمح لنفسه انه يسرقني ...فانا ازاي ما خدش حقي منه ؟؟؟

وانا في الاعدادي بقى كنت بلم فلوس نعمل بيهم نشاط ...وانا في البيت لقيتهم ناقصين وكنت بعيط وفضلت سهرانة اعدهم وكل شوية اقول يمكن بعدهم غلط ...بابا سألني سهرانة ليه ولما عرف اداني الفلوس الباقية وقال لي متلميش فلوس تاني من حد ..

تاني يوم قلت للمدرسة اني مش هلم الفلوس تاني ...وقتها كان اللي بيلم الفلوس ده مشهور قوي :D

زميلة ليا قالت عاوزة تلمهم اديتها الكيس والورقة واصريت انها تعدهم قدامي وتعرف انهم مظبوطين...

بعدها بجد تنفست الصعداء ..كان جبل وانزاح ...وبرضو اتسرق منها الفلوس

لما عرفت مين اللي بيسرق ...قالت لي متقوليش لحد ابوس ايدك انا هتغير ومش هاعمل كدة تاني 

انا سكتت بصراحة وعالطول اتسرقت بعدها ...روحت قلت لها هاتي الحاجة ...حلفت بايمانات المسلمين ان مش هيا وعيطت جامد

وقالت لي انها معدتش بتسرق وان انا ظالماها 

لقيت الحاجة المسروقة بعد كدة مرمية في اخر الفصل ..بس بعد ايه ؟؟كنت عيطت وانهارت وتكة كمان وكان هيغمى عليا ..

لحد دلوقتي بجد مش عارفة 

اي التصرفين كان الاصح ؟؟ لما فتحت شنطة السارق واخدت كتبي ولا لما سكتت وما قولتش عالبنت؟؟

بس بغض النظر عن كل شئ

اعتقد ان لولا كلام بابا ليا لما قال لي مش هاجيب لك كتب تاني او لما قال لي متلميش فلوس تاني بجد انا مفتقدة جدا للايام دي

...اعتقد كل ما بتكبر وبتحصل على استقلالك بتبعد اكتر عن الناس اللي انت في اشد الحاجة ليهم ولنصيحتهم في حياتك

كبرياء وكرامة

حسنا : اولا لنتفق جميعا على شئ واحد وهو

انه لم يثبت حتى الان ان ايه تجربة علمية تحدث بنفس اطراف المعادلة وتحت نفس الظروف سوف تتغير نتائجها اذا قمت بها في وقت اخر ...

السبب في ذلك ليس الا ان اية تجربة تقوم على طرفي المعادلة والظروف التي تحكمها وليس للوقت اي تدخل بها ...

كيف اذا يتوقع شخص تم رفضه من قبل فتاة بشكل قاطع انها سوف ترضى به في وقت اخر...

لماذا تبدأ اسطوانات الالحاح في الظهور و ادخال عناصر اخرى من الاشخاص من شأنها ارباك الشخص وجعله في موقف ضغط او احراج ...

ما الذي تغير منذ الامس لليوم ؟ ولا اتكلم هنا عن الرفض المسبب الذي يزول بزوال السبب وانما اتحدث عن الرفض النهائي القاطع ...

لنكن واضحين اكثر ان الفتاة التي تعتقد ان هذا الشخص يحبها لذلك هو يلح في طلبه ..هي مخطئة ...هذا الشخص لو كان يحبك لكان احترم قرارك ..

انما هناك شئ يكون دفين في قلب اي ذكر وهو مضاد للكبرياء والكرامة

" لماذا رفضتني ...سوف اجعلها توافق علي في النهاية ... ساجعل الامر كما لو ان لا يوجد ملاذا لها غيري ... لا سوف اجعلها لا تنفعني ولا تنفع غيري "

تعرفون جميعا الدعاء المشهور

((الْلَّهُم إِنِّي أَعُوْذ بِك مِن الْهَم و الْحَزَن , و أَعُوْذ بِك مِن الْعَجْز و الْكَسَل , و أَعُوْذ بِك مِن الْجُبْن و الْبُخْل , و أَعُوْذ بِك مِن غَلَبَة الدَّيْن و قَهْر الْرِّجَال))

هذا الدعاء مقسم الى اجزاء متدرجة في الصعوبة تبدا من الهم والحزن وتنتهي الصعوبة بغلبة الدين وقهر الرجال
واعتقد ان هذا ما يحدث عندما يتم رفض رجل من قبل امرأة ويصبح مقهورا ولا يتقبل فكرة الرفض
قهر الرجل هذا هو ما يحركه ....

انه يوازي عند النساء كيدهم فالنساء ايضا يحركهم الكيد عند شعورهم بالقهر...  في ذلك الوقت الذي يحرك الرجل فيه تفكيره الشيطاني والمبتكر والمبدع للتسبب بقهر الفتاة التي امامه لمجرد شئ واحد ....انها ابدت رأيها بعدم الموافقة عليه ...

ادعوا لزميلنا

في حال اخبرني احدهم بتلك القصة ساقول انه اختلقها واختزلها من احد الافلام القديمة واراد ان يشبع رغبة لديه في اثارة الاهتمام الا ان هذا ما حدث بالفعل ..

منذ اسبوعان شاهدت صورته تملأ مواقع التواصل الاجتماعي..لكن القصة بدأت منذ ثلاث سنوات تقريبا كان شابا نشيطا يملأ الاجواء مرحا ..يحبه كل من يراه ويحترمه من يتعامل معه

تقابلت معه في العمل كان كلما رآها ابتسم في تحيتها وسأل عن حالها كثيرا ويمزح اكثر ويتحدث كثيرا قبل ان ينصرف. 

في كثير من الاحيان يسحب كرسيا من المكتب ويجلس ليتحدث كثيرا ويحكي الحكايات الطريفة حتى ظنت انها شخص خاص بالنسبة له ...
انتظرت طويلا لتلك اللحظة التي سوف يتحدث معها ويخبرها بمشاعره بوضوح ..كان واضحا ان هناك شئ خفي حول هذا الحديث الطويل ولكن لم يحدث.

اتحذت هي الخطوة الاولى والمحت له باعجابها واستعدادها للارتباط الرسمي..
وبالرغم من التلميح لكن بدا انه واضحا ..حتى انه اختفى ..والكلام اختفى والابتسام اختفى

" يا لها من اهانة كيف يحدث هذا لي، هل انا لا اصلح الا للكلام فقط ولا اصلح للارتباط الرسمي، لماذا اذا كان الحديث الكثير والكلام الذي لم يكن له داع؟هل هناك خطأ بي يا الهي..لاني تسرعت واردت ان اعرف نهاية هذا الامر سريعا "

هذا الكلام الذي ظل يتردد في ذهنها وهي تبكي  ظل الامر لسنوات كلما تذكرت الامر تعود ذكريات الاهانة وتجهش في البكاء

تناست الامر فقد مر اعوام الان ...منذ اسبوعان شاهدت صورته تملأ مواقع التواصل الاجتماعي ..قرأت الخبر اكثر من مرة

" ادعوا لزميلنا ....... فقد حياته اثر حادث اليم "

يا الهي ما هذا ..هل هذا صحيح ؟ّ! استفسرت من زملائها عن الامر 

"نعم ..الخبر صحيح ...انقلبت السيارة التي كان يستقلها "

انه الوقت الذي تدور كل الافكار  بداخل رأسها ...هل هو شعور بالحزن ام بالحمد ؟ ماذا لو كان حدث الارتباط الرسمي ؟
كيف كانت تبكي بحرقة كلما تذكرت تحطم قلبها واهانتها ؟ لماذا لا تبكي الان ؟ اين هي هذه الدموع التي كانت تخرج من مجرد التذكير بالامر ؟  كيف اصبحت المشاعر كلها مختلطة بهذا الشكل؟ 

تظل تفكر ان الاقدار تعاندك وان الامور تقف ضدك وانك مكتوب عليك الشقاء طوال حياتك .. تظل تفكر في الامر كثيرا وكأنك تحاسب الله على قدرك وما يحدث لك ...لكنك لا تعرف ابدا ان هذه الامور من رحمته عليك ..ومعرفته بك... وحبه لك 

(رَبَّنَا لاَ تُؤَاخِذْنَا إِن نَّسِينَا أَوْ أَخْطَأْنَا رَبَّنَا وَلاَ تَحْمِلْ عَلَيْنَا إِصْرًا كَمَا حَمَلْتَهُ عَلَى الَّذِينَ مِن قَبْلِنَا رَبَّنَا وَلاَ تُحَمِّلْنَا مَا لاَ طَاقَةَ لَنَا بِهِ وَاعْفُ عَنَّا وَاغْفِرْ لَنَا وَارْحَمْنَا أَنتَ مَوْلاَنَا فَانصُرْنَا عَلَى الْقَوْمِ الْكَافِرِينَ)

بسم الله الرحمن الرحيم

لانها المرة الاولى لي على هذه المدونة ..اعترف بان سبب كتابتي فيها ان هناك الكثير مما بداخلي  اشعر بانه يمزقني اربا في حال لم اتخلص منه ..فجميعنا يمر باوقات يصبح بها هشا ضعيفا يسهل كسره بل ويجب ان نعترف جميعا انه في ذلك الوقت  يتفنن البعض  ان يجعلك اشلاء غير قابلة للترميم مرة اخرى ....وهذا ما اطلق عليه سنوات الكسر

لكن..هل فعلا لا يوجد سبيل لاصلاح النفس التي كسرت لترميمها وجبرها ؟ هل يمكن ان تتكسر نفسك وتنصلح وتتكسر وتنصلح وهكذا وتظل كما هي ؟

اعرف جيدا انه في حال انكسر وعائا للماء اصبح لا يصلح للاستخدام سيظل يسرب دائما جراء الشرخ الذي الم به .
هذا في حالة اشروخ البسيطة اما في حالة الكسر الفعلي فقد تختفي احدى القطع الصغيرة التي لا يصلح الوعاء بدونها ..


لكن اعرف جيدا ان هناك اشخاص رائعون في اعادة التدوير ...مبتكرون ومصابرون للدرجة التي قد تجعلهم يحاولون لسنوات لاعادة هذا الوعاء كما كان يحاولون ويحاولون ويحافظون على هذا الوعاء في مكان امين حتى لا يتعرض للتحطم مرة اخرى ...


مثل هذه الامور قد تحدث مع قلبك ونفسك قد يحدث لك ما يجبر الخاطر بل وقد تجد من داخل ما كسرك ما يجبرك و يحيرك و تعرف ان ذلك كان خيرا لك وخيرا عظيما ايضا ...في زمانه ووقته عندما تتكشف جميع الحقائق امامك... وتعرف ان حزنك هذا لم يكن مبررا وان الدنيا لا تسير هباءا ولكنها تسير وفقا لاقدار الله .... وهذا ما اطلق عليه سنوات الجبر والحب


ارجو ان تكون في مدونتي هذه بقعة ضوء لشخص واحد مهموما ..استطيع ان اضع امامه املا قبل ان يموت الامل ...او اجبره قبل ان ينكسرقلبه ويتخلص منه ...اساعده على اعادة النظر في امر كان غير واضح امامه ..